Festival Entrepontes (II edición)

O Festival Entrepontes

Nace da ilusión e o traballo de todas as persoas integrantes da Asociación Cultural Fillos do Chaira de Rábade (Lugo), para programar na nosa vila un evento musical á altura doutros grandes concertos ao longo da xeografía da nosa comunidade autónoma.

Un espectáculo que permita non só achegar a cultura ao medio rural (afastado, polo xeral, dos grandes circuitos musicais), senón tamén contribuír ao seu desenvolvemento local.

Así, en maio de 2023, tivo lugar a primeira edición do Festival Entrepontes. A súa programación foi deseñada tendo en conta unha serie de premisas básicas:

• Idioma, a maioría das actuacións do cartel son en galego.

• Diversidade de públicos, contando con actividades infantís e bandas coñecidas polo público máis maior da vila.

• Perspectiva de xénero, contando con presenza feminina como figuras principais de diferentes propostas.

II Edición do Festival

Nesta edición, mantemos os nosos principios cun cartaz dunha calidade innegable.

Cando? O 25 de maio · Onde? No campo da feira de Rábade · Horario? Dende a vermú ata que o corpo aguante · Para quen? Para toooodos os públicos! · Que nos imos atopar? Música de todo tipo, foodtrucks, diferentes actividades e un bo rollo incuestionable!

Recompensas exclusivas

Para poder seguir facendo deste evento unha data significativa da nosa vila e que se manteña no tempo, precisamos que nos axudedes a completar este crowdfunding. Para iso, ofrecémosvos as seguintes recompensas, que só se venderán mediante esta plataforma:

• Tote bag oficial do festival, para que poidas levar o teu kit festivaleiro.

• Pucho oficial do festival, para que vaias ideal chova ou faga un sol de xustiza

• Imán deseñado especialmente para esta campaña, artesán, feito pola artista local Claudia Rodríguez. Boceto similar á imaxe.

• Camiseta edición limitada con deseño representativo da vila ilustrado pola artista e veciña chairega Lucía Graña

¿Queres saber máis sobre nós?

A Asociación Cultural Fillos do Chaira nace no verán de 2019 na vila de Rábade (Lugo), coa intención de axudar, na medida do posible, a dinamizar a vida social na vila e a desenvolver o sentimento de comunidade, unha comunidade na que se mesturasen todas as xeracións, incluídas as máis novas. Malia o contratempo que supuxo a pandemia, fomos quen de realizar numerosos proxectos, todos eles cunha acollida excepcional por parte da nosa veciñanza.

• Charlas científicas. Achegando a ciencia á cidadanía.

• Actuacións musicais

• Documental Falando de Rábade. Documento audiovisual para a posta en valor do pasado na nosa vila. A través das persoas maiores de Rábade gardamos testemuñas da nosa historia máis recente para que perduren durante xeracións.

• Club de lectura interxeracional

Segue todas as novas do festival en Instagram

E tamén as da nosa asociación