¡¡Tercer Oxetivu!!

Llevamos 8 díes col crowdfunding y en menos de 60 hores consiguimos superar l'oxetivu inicial de 1000 euros col qu'empezar a poner los pegollos del Rebolleres Rock na so edición más difícil. Agora tamos acabante de superar la nuestra segunda marca, la del Rebolleres Solidariu y toles actividaes que s'entamen alredor del festival durante tol mes de xunetu.

Sabemos que tamos pidiéndovos munchísimo y por eso queremos reiterar les gracies mil veces porque ensin vosotros esti añu la cellebración del festival taría poniéndose mui pindia. Queremos tratar a los voluntarios como merecen y por eso vamos algamar esti oxetivu nuevu. ¡¡¡Puxa’l Rebolleres!!!

¡¡Nuevu Oxetivu!!

Gracies pol sofitu que tais dándonos superemos l'oxetivu inicial en menos de 60 hores. Agora queremos consiguir la financiación necesaria pal Rebolleres Solidariu y pa ello necesitamos algamar los 1500 euros. ¿Ayudesnos?

Creyemos n'otra forma de facer les coses y por eso vamos enanchar esti añu un poco más les actividaes paraleles al Rebolleres Rock.

Por cuenta de la negativa del Conceyu de Carreño de confirmar el presupuestu col que va poder cuntar l'Ensame Xuvenil Trisquel pa la celebración de la edición 2016 del festival Rebolleres Rock, vémonos na necesidá de buscar métodos alternativos de financiamientu que nos dexen llevar alantre toles xeres que celebramos nel mes de xunetu nel conceyu de Carreño.

Queremos siguir cuntando cola ufierta cultural que llevamos años ufiertando, que la so xera principal faise'l día del festival Rebolleres Rock, pero qu'algama dellos ámbitos como la fotografía, esposiciones, charres, coloquios o recoyida de cebera.

Y ye que dende'l principiu, l'Ensame Xuvenil Trisquel tuvo claro que les sos xeres teníen qu'asitiase nun marcu de solidaridá y que nun fuere namás un actu de diversión y entretenimientu pa la xente que decidiera averase a Candás nel mes de xunetu.

La intención del festival ye ser cada vez más alternativu a les fórmules comerciales habituales y quier ser un espeyu de les lluches sociales y dar más voz a colectivos discriminaos como se lleva faciendo dende la so primer edición.

Unu de los principales oxetivos del enxame xuvenil ye caltener toles xeres de calter gratuitu como hasta la fecha, por eso pidimos la collaboración per adelantao de vós y poder encarar cola mayor solvencia económica tola ufierta que tamos preparando pa 2016.

Queremos caltener toes y caúna de les xeres yá programaes en 2015 y si ye posible medrar. Pa ello pidimos la collaboración de vós, necesitamos tener una base sobre la qu'entamar a trabayar y yá que dende les instituciones nun faen más que ponenos piedres nel camín queremos facelo lo más autoxestionao posible, sabiendo qu'agora ye imposible facelo d'esta manera al 100%.

Una de les más importantes pa nós siempre va ser la recoyida de cebera que facemos en collaboración con Cruz Roja pa les families más necesitaes de la zona. Añu a añu fuimos aumentando la cantidá de comida y na última edición tuvimos cerca de llegar a los 1.000 quilos, cifra qu'esperamos superar esti añu.

Tamién pudimos cuntar cola esposición fotográfica “Destierru y esperanza” sobre'l pueblu saharah.ui, delles charres sobre temes d'interés actual na selmana previa al festival, y el mesmu día del Rebolleres Rock preparáronse xuegos infantiles p'averar la música en directu a los más pequeños y fomentar la cultura.

Por too ello, y p'aumentar el nivel al que llegamos tres 7 ediciones de Rebolleres Rock, pidímosvos sofitu y que podamos cuntar con parte del financiamientu per adelantao pa siguir alantre con esti proyectu que nos roba enforma tiempu pero que nos da la mayor de les satisfaciones al llevantanos al otru día del festival y ver cómo consiguimos pasar adulces a ser un festival de referencia a nivel estatal tanto en calidá organizativa como en calidá humana y respuesta y tratu al públicu y grupos participantes.

¿Pa qué necesitamos el vuesu dineru?

De siguío, vamos cuntavos los gastos que suponen facer el Rebolleres Rock y toles xeres que se faen alredor d'él:

• Cachés de los grupos 12.000€

• Equipu de soníu y lluz 2.500€

• Rebolleres solidariu 500€

• Carpes, valles y camerinos 1.200€

• Compra de bébora y cebera pal puestu 5.500€

• Publicidá 255€

• Cartelos 200€

• Diseños 150€

• Camisetes 500€

• Comíes 700€

• Hoteles 150€

Evidentemente, la mayor parte del financiamientu del festival nun va salir d'esti crouwdfunding, el nuesu oxetivu equí ye sacar los gastos surdíos de los cartelos, diseños, camisetes y hoteles, esto ye 1000€. Si sal más dineru será destinau a cubrir otros gastos del festival.

+ Info

facebook.com/FestivalRebolleresRock
twitter.com/RebolleresRock