Edicións Malafera

Edicións Malafera

Malafera é una editorial independente e autoxestionada con sede en Vigo. Despois de dous anos editando libros e fanzines, buscamos ampliar o noso catálogo e profesionalizar o noso labor.

• Especializámonos en poesía, pero sentimos debilidade por calquera obra monstrosa, por hibridacións de xéneros e formatos.

• Só publicamos obras en galego ou, chegado o caso, edicións bilingües.

• Somos transfeministas, antirracistas e antifascistas. Non aceptamos baixo ningún concepto manuscritos ou achegas que difundan discursos de odio.

Coleccións de libros

Traballaremos tres liñas editoriais:

• Malafera. Unha colección que mestura poesía con outros xéneros e formatos.

• Basilisco. Unha colección de poesía con capas ilustradas polo pintor Ramón Trigo.

• Hidra. Unha colección policéfala onde terán cabida volumes moi variados: novela gráfica, álbum ilustrado, ensaio...

Seguen as novidades que presentamos nesta campaña:

A Trasnoite

Esta obra de Adrián Maceda con ilustracións de Jessica Mariño rende homenaxe á literatura gótica e ao cine teenager estadounidense. O autor tráenos un libro de vampiros coming of age, pero tamén un poemario depurado (que non trasnoitado) que xoga coa lingua ata o delirio.

Apatria

Un poemario de Antón Recamán atravesado pola soidade de pertencer a un fogar perdido.

Eventos e obradoiros

Organizaremos recitais, palestras, obradoiros e outros eventos relacionados coa poesía, comezando polo Club de escrita poética, na Morada Cooperativa.

Fanzines

Seguiremos, coma sempre, coa ZinesFera, o fanzine colaborativo que xunta distintas voces e mans ao redor dunha temática concreta.

Recompensas

As recompensas consisten en diferentes packs cos nosos libros e fanzines. Haberá ademais algúns produtos creados para esta campaña: postais con ilustracións de Nerea Vázquez, Helena Quintela e Ramón Trigo, e unha camiseta deseñada por Futuro Final!

Presuposto

O noso mínimo son 2500€, que nos servirán para cubrir:

• A impresión dos próximos libros (A Trasnoite, de Adrián Maceda; e Apatria, de Antón Recamán) e do próximo fanzine colaborativo.

• Distribución. Un dos principais motivos para este crowdfunding é facilitar que os nosos libros e fanzines cheguen a máis xente. Para isto, destinaremos parte do recadado á creación dunha tenda online, e ao transporte e envío dos exemplares.

O óptimo da campaña son 4000€, para poder destinalos tamén a:

• A adquisición dalgúns aparellos que levamos tempo precisando: un equipo informático, un micrófono e un altofalante.

Quen somos?

Branca Trigo Cabaleiro é unha escritora viguesa. Codirixe Malafera, onde publicou o seu libro Coñecemento do Medo en 2021 e os fanzines Sagrado corazón de Бáба Ягá (2022) e Ω (2023). O seu segundo poemario, Condolore, viu a luz no ano 2022 da man da editora Urutau. Participou nas obras colectivas A lingua en futuro: a mocidade imaxina o 2050 (Catroventos, 2023) e Alguén nos lembrará (Xerais, 2023); e gañou certames de poesía coma o do Concello de Ames e o da Universidade de Vigo. Organiza xunto con outres poetas o micro aberto Cerimonia de Gaivotas.

Alfredo Vázquez, ou 花火, nado na Ribeiriña, estudou filoloxía galega na USC e especializouse en edición filolóxica. Actualmente escribe e codirixe Malafera, onde publicou os fanzines Os catro selos (2021) e Gardar como… (2023). Participou en diversas publiacións colectivas e festivais poéticos. Organiza xunto con outres poetas o micro aberto Cerimonia de Gaivotas.

Calendario previsto

Todas as recompensas se enviarán durante o mes de outubro.

Máis información

Pódesnos seguir nas redes
Instagram
Twitter