LLAMANDO A CONCEYU

Quién somos

El GRUPU DE BAILLE T. SAN FÉLIX lleva dende 1983 trabayando pola recuperación del baille y la vistimenta tradicional d'Asturies.

Nel añu 2013 estrena PALABRES (Premiu de la crítica RTPA al meyor espectáculu del añu) col que da un pasu na renovación del baille asturianu. Y d'ehí surde tamién esti proyectu.

Enlaces

Instagram Llamando, Instagram San Félix, Facebook San Félix.

Sobre “Llamando a Conceyu”

Llamando a conceyu naz d'otra dómina, na que trabayos como la pesca yeren más avezaos, y quier dar a conocer esi tiempu a les nueves xeneraciones, enfrentándola a l'actualidá, a la realidá que güei conocemos y que, anque nun lo creyamos, tampoco ye tan diferente porque parte d'ella.

Quier dar a conocer la situación de les muyeres d'antaño y el camín que percorrieron pa llegar hasta l'actualidá, los problemes que tuvieron daquella y los que siguen teniendo agora.

Quier amosar la sostenibilidá mediuambiental venceyada cola mar, porque la mar ye una de les protagonistes de la hestoria. Too socede alredor d'ella y, na representación, falaráse de cuidar los nuestros mares pa que puea siguir siendo protagonista.

Amás, Llamando a conceyu quier dar un pasu alantre na renovación de la conxunción música y baille tradicional pa llegar a les nueves xeneraciones, creando un nuevu conceptu de pasucáis que, acompañáu de la palabra, avéralu al teatru de cai.

La música (creada por Javier Tejedor), de dellos estilos sofitada na música tradicional, y el baille entá más averáu a la tradición, pero intentando amosar muncho más, representen les palabres pronunciaes por una persona, los sos suaños, les sos alcordances.

La so palabra (en boca de Raquel Prendes) fala de los conceyos abiertos, que tuvieron un papel cimeru na organización social de los pueblos, y qu'entá se caltienen en dellos llugares d'Asturies. Ye una palabra actual y averada a la hestoria, la cultura y la realidá d'esi llugar. Porque Llamando a conceyu naz de la sociedá pa la sociedá.

Pa qué se van usar les vuestres aportaciones

Llamando a conceyu ta anguaño nos últimos díes de trabayu: con xera nel local d'ensayu y con xera nel estudiu de grabación. A esto hai que sumar la xera de producción de la estrena del espectáculu, que ye a lo que se va empobinar la vuestra ayuda: al soníu, preferentemente.

Calendariu

El domingu 17 d'avientu a les 13 hores en Candás (esi mesmu día de 10 a 12 van dase les recompenses en La Baragaña, Candás. Si nun ye posible pa ti nesa fecha, buscaremos xuntos/es otra) va estrenase ensin nengún sofitu económicu, por eso'l GRUPU DE BAILLE TRADICIONAL SAN FÉLIX entama esti VERKAMI, que va ayudanos a qu'esti espectáculu siga alantre.

GRACIES Y VÉMONOS EL DOMINGU 17 EN CANDÁS.