Llibru-discu de La Bedur

Primer trabayu de La Bedur

La Bedur, ATEM, 2024

La Bedur ye un tríu de música tradicional asturiana que reelabora los sones recoyíos gracies a la oralidá y la intertextualidá a la manera de les músiques contemporánees. La idea principal del grupu ye la de revisitar los vértices y los bordes de la música de raíz d’Asturies y los territorios d’alredor p’amostrar al públicu una nueva posibilidá estética dientro de la gran etiqueta de «música tradicional» o «música folk».

La Bedur ta compuesta por tres músicos formaos nel movimientu de la música popular asturiana que confluyeron nes sos reflexiones sobre cómo se podría dar una nueva vida a la tradición dende un puntu de vista actual. Asina, el pianu, la flauta travesera de madera y el vigulín axúntense a la hora de crear un espaciu poco transitáu pola música contemporánea asturiana.

Con estes premises adentráivos nel universu La Bedur: ye seguro que nun vais marchar indiferentes.

Siguíinos na canal de Youtube de La Bedur y nel Instagram de La Bedur.

El discu

La Bedur busca agora financiación pa la edición del so primer trabayu discográficu, que va ser colgáu nes plataformes en rede y que físicamente va tener forma de llibru didácticu. El proxectu, que va ser homónimu al grupu, va tar publicáu pol ATEM, vinculáu a l'Asociación Mezá, y va tener una estructura empobinada a la divulgación del repertoriu tradicional.

Amás, La Bedur va presentar textos lliterarios de Xuan Bello, Lorena Souto, Hedoi Etxarte y Javier de Pendia, que van arredondiar un diseñu que cuerre a cargu del artista plásticu Miguel Galano. La maquetación va llevala la Editorial Trabe.

Nome

La bedur ye, posiblemente xunto’l carbayu, la faya y la castañal, l’árbol más característicu de toa Europa, hasta’l puntu de ser un elementu básicu pa munches cultures. De la bedur aprovéchase la madera, l’arna, la pez, les cañes y los raigones. La calor que da la madera calez les cases dende la prehistoria y el fumu que da al ser quemao cura los males y los productos cárnicos nos que se asentaron cientos de pueblos a lo llargo de l’área onde se da. N’Asturies, la bedur, coles variantes asturianes de nome bedul, bedural, abedoriu, abeduru, abeduriu, abeduliu, abidur, abidul, abedugu, abeúl, abedulu, abulu o abedul, o gallegues, como bidureira, budueira o bedueira, ye un árbol que sirvió y sirve pa infinidá d’usos y que ye bien apreciáu pol so medrar rápido y pola so adaptabilidá a los terrenos.

Estilu

L’estilu de música al que se puede adscribir el grupu ye’l más puru de la música tradicional o de raíz, anque ye notable la cantidá d’influencies de la música bal-folk, jazz, pop, celta o clásica contemporánea. Orixinalmente la etiqueta de "música tradicional" usábase pa designar un tipu de melodíes bailables de les zones rurales, pero agora yá pasó a emplease tamién n’otros ámbitos onde se toma como referencia cualesquier son recoyíu en cualesquier estaya de la tradición. Agora la música tradicional foi dando pasos hasta evolucionar no que güei conocemos como modernidá.

La Bedur asiéntase na etiqueta «música tradicional contemporánea» pa definir lo que se presenta agora: música pa escuchar y bailar por disfrute na actualidá. L’arte que se crea colos intrumentos, colos cuerpos de los músicos o de los bailadores mientres toquen o bailen defínenos como humanos, como persones que pertenecen a una determinada cultura. D’esta manera, la elegancia cola que nos mostramos al públicu ye la única clave que tenemos pa desmacarnos como individuos dientro d’un colectivu.

Componentes de La Bedur

Pepín de Muñalén (Muñalén, Tinéu, Asturies, 1975) ye un multiinstrumentista conocíu na música asturiana de raíz. Formó o forma parte de los grupos Bron, Tuenda, La Bandina’l Tombo y Caldo & Os Rabizos, ente otros, y colaboró con decenes d’artistes y iniciatives musicales a nivel local y internacional. En La Bedur toca’l vigulín y aporta muncha información musical y cultural personal.

Rodrigo Roces Nuño (Negales, Siero, Asturies, 1986) ye pianista de formación, anque empezó cola gaita y la curdión nel principiu de los 2000. En La Bedur toca’l pianu y encárgase de l’harmonización del repertoriu.

Miguel Rodríguez Monteavaro (Boal, Asturies, 1990) combina’l llabor de músicu col d’escritor y docente. Los grupos nos que participó son Mezá y Caldo & Os Rabizos, centraos ellos na publicación, sobre too, del Archivo da Tradición dos Ermaos Monteavaro (ATEM). En La Bedur toca la flauta travesera de madera y encárgase de la xestión xeneral.

Gastos

Grabación + mezcla + copies: ~1500€

Diseñu + maquetación: ~1500€

Recompenses + envíos: ~250€

Presentación: ~250€

Temporalización

Crowdfunding: febreru-marzu 2024

Grabación: febreru-marzu 2024

Presentación y recompenses: setiembre-octubre 2024

Creitos

Fotos: Memoria Gráfica Luarquesa, Memoria Gráfica Boalesa, Andrés Rodrigues

Vídeos de les promos: Cortexiphan Producciones, Lucía Marcos

Soníu promo: Andrés Rodrigues

Ubicación: Casinu de Llanes, Conceyu de Llanes (Asturies)